2 Corinthians 6
1 𠊎等係上帝个同工；𠊎等愛勸你等：既然接受上帝个恩典，就毋好使這恩典落空。
2 因為上帝講：在接納个時節，𠊎有聽你；在拯救該日，𠊎有幫助你。看啊！這下就係接納个時節，今晡日就係拯救个日仔！
3 𠊎等無愛別人譭謗𠊎等个職份，所以𠊎等也一定毋礙到麼人；
4 反轉，為到在逐樣事上表明𠊎等係上帝个僕人，𠊎等忍受各種个患難、艱難，㧯困苦。
5 𠊎等識被人鞭打、坐監，被暴民擾亂；𠊎等辛苦，睡毋得，又肚飢。
6 𠊎等用純潔、智識、忍耐㧯仁愛，通過聖靈、無假个痛惜、
7 真理个話，㧯上帝个大能，來表明𠊎等係上帝个僕人。𠊎等用正義做武器來攻擊敵人，也保護自家。
8 𠊎等受尊敬，也被人侮辱；被人罵，也受稱讚。有人講𠊎等係落仔，其實𠊎等係誠實个；
9 像係無麼介名，其實人人認識𠊎等；有人講𠊎等已經死掉，總係你等看啊，𠊎等還生生噢。𠊎等識受刑罰，總係無被人㓾死；
10 識憂傷，總係常常快樂；識欠缺，總係使盡多人富足；像係無半樣，總係樣樣有。
11 哥林多个朋友啊，𠊎等對你等直腸直肚大度大量。
12 毋係𠊎等个心肝狹，係你等个心肝狹。
13 𠊎像對自家个子女恁樣㧯你等講：𠊎等對你等肚量恁大，共樣，你等對𠊎等也愛大量兜仔！
14 毋好同毋信个人結連共下；佢等个軛㧯你等个軛無共樣。正義㧯邪惡樣做得合作呢？光明㧯烏暗樣做得共存呢？
15 基督㧯魔鬼㖠有協調个可能呢？信主个㧯毋信主个有麼介相干呢？
16 上帝个聖殿㧯偶像有麼介相同呢？永生上帝个聖殿就係𠊎等。像上帝所講：𠊎愛住在𠊎个子民中間，在佢等个當中來來去去。𠊎愛做佢等个上帝；佢等愛做𠊎个子民。
17 所以，主講：你等的確愛離開佢等，對佢等當中分別出來；毋好摸無淨浰个東西，𠊎就會接納你等。
18 𠊎愛做你等个阿爸；你等愛做𠊎个子女。這係全能个主講个。